किरण अधिकारी
कालिकोट — प्रतिनिधि सभा निर्वाचन नजिकिँदै गर्दा नेकपा एमाले कालिकोटले अघि सारेको मूल राजनीतिक एजेन्डा हो— “भरोसा कालिकोटको, संकल्प समृद्धिको”। यो नारा साधारण राजनीतिक वाक्यांश मात्र होइन, कालिकोटको लामो उपेक्षा, जन असन्तोष र विकासको चाहनालाई एउटै सूत्रमा बाँध्ने प्रयास हो।
भरोसा कालिकोटको: गुमेको विश्वास फर्काउने राजनीति
कालिकोटमा राजनीतिप्रति विश्वास कमजोर हुनु कुनै नौलो विषय होइन। चुनावअघि गरिने प्रतिबद्धता र चुनावपछि देखिने बेवास्ताबीचको दूरीले जनतामा गहिरो निराशा पैदा गरेको छ। “भरोसा कालिकोटको” भन्ने सन्देशले यही गुनासोलाई सम्बोधन गर्दैअब नेतृत्व जनताको विश्वासमा टिक्नुपर्ने राजनीतिक संस्कारको माग गर्छ।
उम्मेदवार नगेन्द्र शाहीले भाषण भन्दा काम, आश्वासनभन्दा परिणाम र अस्थायी लोकप्रियताभन्दा दिगो विकासमा जोड दिँदै आएकाछन्। यो एजेन्डा कालिकोटका मतदातालाई “फेरि विश्वास गर्न सकिन्छ कि सकिँदैन” भन्ने प्रश्नको जवाफ दिने प्रयासका रूपमादेखिन्छ।
संकल्प समृद्धिको: नाराबाट योजनातर्फ
“संकल्प समृद्धिको” ले समृद्धिलाई सपना होइन, प्रतिबद्धताका रूपमा प्रस्तुत गर्छ। कालिकोटका लागि समृद्धि भन्नाले महँगो पूर्वाधार होइन, सडक पहुँच, गुणस्तरीय स्वास्थ्य सेवा, प्रभावकारी शिक्षा, कृषि र पशुपालनको आधुनिकीकरण, रोजगारी सिर्जना र युवाको पलायन रोक्नु जस्ता आधारभूत आवश्यकतासँग जोडिन्छ।
यो संकल्पले राज्यसँग माग मात्र होइन, संघीय संसदमार्फत बजेट, नीति र योजनामा कालिकोटको हक सुनिश्चित गर्ने दृढताजनाउँछ।
एमालेको राजनीतिक रणनीति: एजेन्डा + संगठन
नवौँ जिल्ला बैठकले देखाएको संगठनात्मक तयारीले यो एजेन्डा केवल नारामा सीमित नरहने संकेत गर्छ। नौ वटै पालिका कमिटीको रिपोर्टिङ, वडास्तरसम्म सक्रिय संगठन र घरदैलो अभियानको योजनाले एमालेको एजेन्डालाई जनतासँग प्रत्यक्ष जोड्ने रणनीतिमा रहेको देखाउँछ।
जिल्ला अध्यक्ष तुलाराज मल्लले जोड दिएको संगठनात्मक अनुशासन र प्रत्यक्ष संवादले “भरोसा” लाई व्यवहारमा उतार्ने प्रयास झल्काउँछ।
कालिकोटको सन्दर्भमा राजनीतिक अर्थ
यो नारा कालिकोटका लागि आत्मसम्मानको राजनीति पनि हो। सधैं पिछडिएको जिल्लाका रूपमा चित्रित हुँदै आएको कालिकोटलाई अब अधिकार र अवसर माग्ने जिल्लाका रूपमा स्थापित गर्ने प्रयास यसमा समेटिएको छ।
नारा होइन, परीक्षा
“भरोसा कालिकोटको, संकल्प समृद्धिको” एमाले उम्मेदवार नगेन्द्र शाहीका लागि आकर्षक नारा मात्र होइन, राजनीतिक परीक्षा हो।यो एजेन्डाले जनताको भरोसा जित्न सके समृद्धितर्फको यात्रा सुरु हुन सक्छ, नसके यो पनि अरू नाराजस्तै इतिहासमा सीमित हुनसक्छ।
अन्ततः कालिकोटका मतदाताले निर्णय गर्नेछन्—भरोसा फेरि दिने कि नदिने।
